احمد جمعه
بعد تعب دام لأكثر من 5 سنوات تأتي لحظة التقديم لكلية التمريض ويتحقق طموحات طلاب المعاهد الفنية للتمريض ويدخلون الكلية ولكن لاختبار القدرات رأي آخر دخل.
نسبة رسوب الطلاب المتقدمين تجاوزت 99%
في أغلب المحافظات لم ينجح أي شخص والبعض الآخر مثل محافظة الفيوم نجح منهم 3 طلاب فقط من 480 طالب بنسبة نجاح 0.5% بأي منطق ؟
الطلاب على أساس أنه امتحان روتيني حيث اللائحة تنص على أن يكون الاختبار من 100 درجة يتم توزيعهم كالتالي
:
25 درجة مقابلة شخصية
75 امتحان تحريري يتكون من
50 سؤال باللغة العربية يتم سؤال الطالب عن السمات الشخصية
و 25 سؤال قواعد لغة إنجليزية
وهذا ما يحدث كل عام لاختبار الطلاب لدخول كلية التمريض إلا هذا العام ويحدث فقط مع طلاب المعهد الفني للتمريض.
وتفاجئ الطلاب بصعوبة أسئلة المقابلة الشخصية وصعوبة أسئلة الامتحان التحريري حيث تكون الامتحان من 50 سؤال باللغة الإنجليزية والمصطلحات الطبية عبارة عن مواقف طبية وأمراض لم يتم دراستها طوال الخمس سنوات التي قضوها في الدراسه او العمل.
ليس هذا فقط بل وأن الوقت لم يكن كافي كانت المدة 60 دقيقة لكي يتم حل الأسئلة حيث كل سؤال يتكون من 4 و 5 أسطر.
بأي منطق يتم حل 50 سؤال في 60 دقيقة بهذه الصعوبة لدرجة أن بعض دكاترة الجماعه لم يعرفوا اجابات هذه الأسئلة وأن هذه الأسئلة لا تصلح لأن تكون أسئلة لاختبار قدرات من المفترض أن يكون روتيني.
وفي السطور القليلة القادمة يحكي أحد الطلاب من طلاب المعهد الفني الصحي بالفيوم يدُعى أحمد جمعه أحمد بكمية الأسى و الحزن والاحساس بضياع المستقبل نتيجة ما تعرض له هو و زملائه.
يوم الاربعاء 7/9/2022 يوم عمري ما هنساه في حياتي ابداً لانه اليوم اللي ضاع فيه مستقبلي وكل حاجة كنت بخطط ليها بقالي 5 سنين الحكاية بدأت وانا في الإعدادية.
أبقى جايب في 3 إعدادي 294.5 من 300 يعني 98.1% وأكون طول ال 3 سنين اعدادي الترمين أقفل في الانجليزي الرياضيات و في الاخر أقرر اني ادخل تمريض 5 سنين واللي يدخل تمريض وقتها كانوا أوائل الاعدادية وأقل واحد فينا كان جايب 94%.
أول 3 سنين نسافر كل يوم في ابعد مكان في المحافظه بحجة أن مفيش مكان في المحافظه لينا ويرمونا في" اللاهون " ونقول تمام المواد تبقى صعبه وتدرس بال 22 مادة في السنة ونقول تمام وبعدين نوصل لآخر سنتين اللي هما سنتين المعهد ونذاكر كل حاجه بالإنجليزي ونقول تمام وأقعد طول ال 5 سنين مفيش غير هدف واحد بس هو اني أكمل كلية واني أشد حيلي في اخر سنة عشان اجيب مجموع وادخل الكلية اللي هي تمريض مفيش قدامك اي خيار تاني غير كلية تمريض والمفروض تدخل سنة 2 كلية اللي هو تبقى متأخر عن زمايلك سنة وقولنا تمام.
تبدأ سنة تانية معهد اللي هي اخر سنه في ال 5 سنين
وأبدأ السنة جد من اولها لأخرها مذاكره بس كأني في ثانوية عامة سنه كامله بذاكر مش بعمل حاجه في حياتي غير اني اذاكر والحمد لله ربنا يكرمني بمجموع 98.25% و يبدأ الترم التاني بمواد أصعب وفترة أقل والحمد لله عدى على خير وذاكرت وأصبح مجموع الترمين على بعض 96.48% والحمد لله ومن أوائل المعهد وربنا لوحده يعلم قد اي انا تعبت اوي عشان اجيب مجموع زي دا وقد اي المواد عندنا صعبه والموضوع مش سهل خالص.
و يفتح موقع التنسيق عشان اقدم على اختبار القدرات اللي المفروض يكون اختبار روتيني وطول عمره بيتكون من 75 سؤال ب 75 درجة منهم 50 سؤال عربي سمات شخصيه وحاجات روتينية و 25 سؤال جرامر انجليزي عادي خالص و مقابلة شخصية من 25 درجة يعني اجمالي 100 درجة مطلوب تجيب 60 عشان تنجح.
دخلت المقابلة الحمد لله جبت 24 من 25 تمام ندخل بقى الامتحان اللي المفروض أنه روتيني نتفاجئ بإن الامتحان عباره عن 50 سؤال كلهم أسئلة عن حالات باطنه و جراحه و نسا و اطفال وأمراض غير معروفه خالص وحاجات احنا مخدنهاش قبل كدا نهائي ومعاك 60 دقيقة بس تحل فيهم 50 سؤال.
السؤال يبقى 4 و 5 سطور مطلوب انك تحله في دقيقة واحده بس عشان تلحق تخلص باقي الأسئلة.
الأسئلة موجوده فعلا بس للناس اللي في 2 و 3 كلية
اللي هو بيكون عندهم مادة يذاكروها طول الترم ويدخلوا يمتحنوا فيها.
احنا اتغفلنا
احنا اتغفلنا نبقى داخلين على أساس أنه حاجه روتينية ندخل نلاقيه اختبار تعجيزي مش روتيني نهائي والحمد لله النتيجة طلعت ورسبت وأول مرة في حياتي أحس أني عاجز وضعيف بالشكل دا وأول مرة أحس بظلم كبير أوي زي دا.
الحكاية خلصت
خلاص الحكاية خلصت وبعد ما كان عندي طموحات اني أكمل كلية وأكمل دراسات عُليا وزمالات و ماجيستير و ..و.. خلاص كل دا اتبخر بسبب امتحان مدته 60 ساعة كان كفيل أنه يحطمني ويدمر مستقبلي كله.
خلصت حكاية غبائي لما قررت اني ادخل تمريض من اول خالص.
خلصت حكاية غبائي وانا بدمر مستقبلي بنفسي.
دا قدر ربنا ليا ودا نصيبي اني اكتشف في الاخر اني في المكان الغلط بس كنت مغفل طول ال 5 سنين.
و قدر الله وماشاء فعل... لن أسامح أي شخص ساهم في المهزلة التي حصلت معنا.
إرسال تعليق