تلغراف الى

+ حجم الخط -
تلغراف الى,وزير الشباب والرياضة,اللجنة الخماسية لكورة القدم,جورنال مصر
يرسله / رؤوف قنش

■ وزير الشباب والرياضة
على حسب معلوماتى ان مصر فيها ديمقراطية وبتتباهى بها أمام الأمم، يعنى لما يكون فيه تصويت على شيئ معين البديهى بنرضخ للأغلبية مش كده ولا انا مش واخد بالى والقرار موافقة من عدمه مش كده ولا ايه ، طيب لما هوه كده ليه مافيش إستجابة للأغلبية فى مسألة عودة الدورى واكتر من ١٢ فريق قالوا ورفعوا ايديهم واشاروا ( لا لعودة الدورى ) واللى موافق ٥ فرق تقريبا ، والمشكلة تصمم على رأيك ولازم عودة النشاط لصالح مين وليه الإجابة عندك ، كان اكرم لك تقول ده قرار دولة والدولة اللى قررت وده امر واجب النفاذ الكل كان هيقولك آمين ، انما تعمل ديمقراطية على ارض الواقع والأغلبية تقول لأ وحضرتك واخد القرار يبقى ده تسميه ايه ، حاجة تضحك والله ، وعلى سبيل الضحك والسخرية مشهد فى مسرحية المتزوجون جورج سيدهم بيسأل نجاح الموجى تعرف ايه عن الديمقراطية رد الموجى وقاله( انا الشعب ) بص له جورج وقاله دى ( سياسة أمك )الديمقراطية فى بعض الهيئات عندنا عبارة عن كوكتيل سمك لبن تمر هندى ونرش عليه شوية ملوخية .

■ اللجنة الخماسية لكورة القدم
كان لازم وواجب عليه انى اقدم لكم التحية على مجهوداتكم العظيمة وقراراتكم الصائبة وإعطاء كل ذى حق حقه ، منتهى الإيثار وإنكار الذات، سبحان الله اعتقد يعنى والله اعلم بعد ماصليتم كلجنة خماسية ركعتين إستخارة ربنا الهمكم للصواب وظهر لكم انكم ولابد تقدموا المساعدة للاعبى الكورة ويتعمل لهم مسحتان للكورونا اسبوعيا علشان هما مساكين ومن محدودى الدخل ومش لاقيين ياكلوا وبيلعبوا باليومية بالزمة ده كلام يعقل ياناس ، لعيبة تاخد بالملايين ويتعملهم مسحات على حساب الدولة بالملايين والناس اللى اصلهم مساكين فى الشوارع مرميين ، والأطباء والتمريض اللى بيعالجوا المساكين وزارة الصحة مش عارفة تعملهم مسحات وتحافظ عليهم بما انهم ثروة قومية ، ياوزيرة الصحة صلى ركعتين إستخارة يمكن ربنا يلهمك الصواب وتعملى مسحات للى مخلينك موجودة على كرسى الوزارة حتى الأن ، المثير للدهشة ان يطلع مسئول عن فريق فى الدرجة الرابعة ويقول ان المسحات اللى بتتعمل للعيبة منحة من الاتحاد الدولى ( الفيفا )والدولة مالهاش علاقة بالموضوع ده ومش هتدفع ولا مليم ، واستند على خبر صحفى يحمل فى طياته الصدق والكذب ، وعلى الجانب الأخر يطلع مسئول ايوه مسئول من اتحاد الكورة وشغلته على المدفع (مدير تنفيذى) ويصرح ان الاتحاد المصرى والدولة هيتحملوا كافة التكاليف وبالملايين يبقى اصدق مين ؟؟؟ اصدق اللى بره المطبخ وهو الصحفى ولا اصدق اللى جوه المظبخ اللى هو المدير التنفيذى !!! هو بس علشان الموضوع يهم مسئول الفريق اللى فى الدرجة الرابعة علشان هيتعمل لفريقه مسحات وهيتعمل للمسئولين كمجلس ادارة والإداريين عن الفريق يبقى لازم يصدق كلام الصحفى اللى بره المطبخ .