يرسله / رؤوف قنش
كنت لازم اعمل حسابى واخد بالى من كتر الهدايا والغلوس والمكافأت اللى بتنهال على النادى كده عمال على بطال وكمان شراء اللاعبين والوجبات اللى بتتوزع على الجمهور ، كنت لازم كادارة احترس لأن اللى جاى كبير اوى والفاتورة هتتسدد من خزينة النادى وهيبقى الشكل العام وحش، وكل واحد خاد هدية هيرجعها ، يبقى ليه من البداية احط صباعى تحت ضرس تركى آل الشيخ ويقعد يعايرنى ويهزقنى بالشكل المهين ده ويشتم فى الادارة ويشتبك مع الجماهير والجماهير تشتبك معاه ، ويتحايل عليكم اكتر من مرة انكم تقبلوا استقالته وانتم بترفضوا ومش عارف ايه السبب ؟ حتى جماهيركم ماتعرفش ايه السبب ، والحجة ان احنا قافلين على نفسنا ومافيش حد يعرف عننا حاجة وادى النتيجة قفلتوا على نفسكم لما خنقتوا نفسكم وتركى هوه اللى مد لكم الحبل علشان تلفوه على رقابكم ، كان لازم تعرفوا ان الصوت الواحد غلطاته كتيرة ، انتم عارفين يعنى ايه تسددوا حوالى نص مليار جنيه يعنى النادى يمكن يدخل فى مشاكل كان فى غنى عنها كان لازم الأهلى يتعامل معاه بعد ماعرفوا نواياه وستم ولوح بالاستقالة اكتر من مرة بالمثل اللى بيقول يانحلة لاتقرصينى ولاعايز منك عسل .
ربنا يجعل كلامى خفيف عليكم ، كل مجالس الادارات اللى كان لها الشرف انها تقود النادى بتعتبروهم رسل وآلهة معصومين من الغلط واللى بيقولوه ويعملوه هوه الصح ولا جدال ولامناقشة فقط قولوا آمين ، سبحان الله مع انهم بشر ولازم يخطئوا ، للأسف اعطوكم الإيحاء بكده حتى اصبح ورث وكل مشجع اهلاوى بيبث عند اولاده الجزئية دى ، يعنى على سبيل المثال المشكلة الأخيرة والفلوس والهدايا والمكافأت اللى تركى زل الأهلى بها بدل ماتوجهوا اللوم على الادارة لقيت غير كده لقيت حاجات معتادة وبترددوها على طول فى الحلوة والوحشة زى ( احنا نادى المبادئ والقيم والعادات والتقاليد وادارة الأهلى لايسق لها غبار ) ايه الكلام ده هوه لسه فيه كده ، ولما هوه كده النادى بيقبل الهدايا ليه من الأول وبيوزعها يمين وشمال ، سبحان الله زى ما الادارات اعطيتكم ايحاء انهم صح على طول الخط انتم كجمهور اعطيتم للادارة ايحاء انهم فوق كل حساب ومعصومين من الخطأ .
● تركى آل الشيخ
من الاخر انت مش اهلاوى ، انت كنت داخل النادى تلعب وتتسلى ولما تمل من اللعبة وتزهق منها تعلب باللى خلوك تلعب وتتسلى وسمحوا ليك تبيع وتشترى فيهم بالشكل ده ، يعنى ايه تهادى وتعاير ، وليه ادارة الأهلى سمحت ليك تتكلم عليهم بالشكل ده وتعلى صوتك ، ادارة الأهلى كان لازم يفطنوا ويعرفوا نيتك الوحشة وياخوا بالهم منك ومن تصرفاتك ويعملوا كنترول وحدود وده اللى ماعملتهوش الادارة ، شايفينك من زاوية واحدة بس زاوية الفلوس ، وكان مشكلتهم انهم مش عايزين يعملوا معاك مشكلة لأنك بتغرف وتديهم وساكتين على الاهانة والاخر تعايرهم وتقول كلام يحزن ، وتيجى ترمى كرسى فى الكلوب وتقول هاخد كل الأموال والهدايا وعلى صندوق تحيا مصر ، لعبت بالأهلى وعايرته بس خد بالك دى مصر مش هتقدر تعايرها ولاتقول عليها كلمة وانت عارف كده كويس .