كتب - ميار السطوحي
البدايه:
اول ما دخلت كنت خايف..والمدرسين كانوا شداد
قالوا لينا بلاش دلع
وتذاكر في يوم خمس مواد
انا مدتي لازم تتقفل عشان كدا ركز معايا:
حصتك اربع ساعات ..تفضل قاعد من سكات
الواجب من صفحه ١ لحد صفحه ٥٠
لو حبيت تسأل في الحاجه "انا اسف مش هجوبك"..في عندك بره مساعدين
الحصه الجايه امتحان
ي تقفل ي تبقي برة
انا معنديش طالب تعبان
نص الترم:
انا مليت..اخدت كلام من اتعب عشان تلاقي واستكفيت
حاطت قدامي حلمي علي حيطان البيت
قافل علي نفسي..ومرة من نفسي احس اني لاقيت
تعبت كتير ..وبقول لنفسي ولا تخافي
و رايح جاي ..شايل كتبي علي كتافي
واضتي بقت ورق بالكوم
ولا بهتم لا بأكل ولا بهدوم
اخر الترم:
سقط ..نجحت
عادي مش فارقه
هتكرش واي يعني ..هايجي غيري
ما هي الثانويه بقت تجارة وسارقه
في الوقت الحالي:
متخيل..الموضوع بقا متنيل
مستقبلي واقف علي بوست
في جروب فيك
علي فكرة يعني العيب فيك
مهو لو كنت ذاكرت من الاول
الموضوع والله اتحول!
وخلاص ما بقاش عندي الطاقه
وابويا بدل ما يقطع عني النت
بقا بيدفعلي تمن الباقه
انا لسه في أول فيديو
والمستر بقا في التمانين
الدفعه كلها مش بتذاكر ..الدفعه كلها بتذاكر
دي دفعه مش سالكين!!
خايف من الكورونا..خايف من الثانويه
محتاجين بعد تالته ثانوي ..نروح لدكاترة نفسيه