كتب - محمود حجازي
محدش فى العالم عنده عيش اسمه العيش الفينو غير الاسكندرانية فى مصر، هناك أنواع أخرى من العيش الافرنجى، إسمه عيش افرنجى باجيت بيتى بان.
لكن احنا عندنا عيش فينو ليه ؟
الحدوته بدأت فى اسكندرية لما إفتتح أحد الخواجات بحى الإبراهيمية مخبز للعيش الافرنجى لكنه عمله بطريقة معينة مش زى الباجيت الكبير أو البتى بان الصغير لا عمل حجم معين بطريقة معينة ليصبح فيما بعد أشهر حلوانية و مخابز الإسكندرية.
فى حى الإبراهيمية عاش الخواجة فينو و إفتتح مخبزه بأشهر شوارعها ، هو شارع لاجيتيه.
كان فينو يتقن صنعته فعمل للاسكندرانية و الأجانب من سكان الإسكندرية عيش ليه طعم غريب الطعم حكاية لا يعلى عليه.
وحدة وحدة بقى إسم فينو يعنى الفخامة والطعم المميز.
فى صباح كل يوم كل اطفال اسكندرية اتربوا على العيش الفينو مش بس كده كان بيعمل جاتوه يناسب جميع الطبقات لدرجة أن جه وقت كانت عائلات الطبقة المتوسطة فى الإسكندرية تتفاخر بحجز العيش الفينو والجاتوه للافراح من عنده.
مع الوقت ذاع صيت الخواجة فينو وإنتشر ، لدرجة أن العيش انتشر فى كل مخابز الإسكندرية وبقى اسمه عيش فينو لا افرنجى ولا اى حاجة تانية.
وأصبح إسم الخواجة فينو هو براند لوحده وانتقلت ملكية المحلات إلى أحد العائلات السكندرية المحترمة ومازالت تحتفظ بالاسم رغم تعاقب الأجيال.